close

Friday, July 28, 2017

జనరల్

పరిశ్రమల స్థాపనకు ఏపీ ప్రభుత్వం సహకారం: డాక్టర్‌ జోయెల్‌ విగ్గిన్స్‌
మంగళం(తిరుపతి), న్యూస్‌టుడే: ఆంధ్రప్రదేశ్‌లో పరిశ్రమల స్థాపనకు ఔత్సాహిక పారిశ్రామిక వేత్తలకు ఏపీ ప్రభుత్వం విశేషమైన ప్రోత్సాహాన్ని అందిస్తోందని అమెరికాకు చెందిన క్రౌన్‌ కాలేజ్‌ ప్రెసిడెంట్‌ డాక్టర్‌ జోయెల్‌విగ్గిన్స్‌ పేర్కొన్నారు. తిరుపతిలోని ఏపీ ఇన్నోవేషన్‌ సొసైటీ ఎక్స్‌ఎల్‌ఆర్‌8లో ‘రిస్క్‌ మిటిగేషన్‌ అండ్‌ వ్యాల్యుఏషన్‌ ఇన్‌ ఎ స్టార్టప్‌ వెంచర్‌’ అనే అంశంపై గురువారం శిక్షణ నిర్వహించారు. ఈ కార్యక్రమానికి రిసోర్స్‌ పర్సన్‌గా హాజరై ఆయన మాట్లాడుతూ నూతన రాష్ట్రం ఆర్థికంగా పుంజుకోవడానికి, ఆర్థిక వనరులను సముపార్జించుకోవడానికి ముఖ్యమంత్రి చంద్రబాబు నాయుడు చేస్తున్న కృషి ప్రశంసనీయమన్నారు. దేశవిదేశాల్లో ఉన్న పేరుమోసిన వ్యాపారవేత్తలను, పారిశ్రామికవేత్తలను వెతికి, గుర్తించి రాష్ట్రానికి తీసుకువచ్చి మరీ వారి సేవలను పొందేందుకు చేస్తున్న కృషి అభినందనీయమన్నారు. ఆస్ట్రియా దేశంలోని ఐసీ స్కైర్‌తో ఒప్పందం కుదుర్చుకుని, ఏపీ ఇన్నోవేషన్‌ సొసైటీ ఆధ్వర్యంలో ఎక్స్‌ఎల్‌ఆర్‌8ను స్థాపించి, దేశంలోని ఔత్సాహిక పారిశ్రామిక వేత్తలను, గొప్పగొప్ప ఆలోచనలతో వచ్చేవారిని ప్రోత్సహించడం గొప్ప విషయమన్నారు. ఇప్పటికే ఈ సంస్థ ద్వారా దేశ వ్యాప్తంగా వందలాది మంది పారిశ్రామికవేత్తలు మేలు పొందడం అభినందనీయమన్నారు.త్వరలోనే రాష్ట్రంలో స్టార్టప్‌లను ప్రాంభించేందుకు ఎక్స్‌ఎల్‌ఆర్‌8 ద్వారా ఎంపికైన 33 మంది ఔత్సాహికులకు సరైన దిశానిర్దేశం చేయడానికి తనను అమెరికా నుంచి ఇక్కడకు పిలిపించారన్నారు. వరల్డ్‌క్లాస్‌ పారిశ్రామికీకరణకు సీఎం ఎంతో నిబద్ధతతో చేపడుతున్న కార్యక్రమానికి తనవంతు సహకారం అందించడం ఆనందంగా ఉందన్నారు. ఎక్కడైనా స్టార్టప్‌ కంపెనీలను ప్రారంభించేవారు ప్రధానంగా వనరులను సమకూర్చుకోవడం, ఉత్పత్తి, విస్తృతమైన మార్కెటింగ్‌ ను ఏర్పాటు చేసుకోవడం, మ్యాన్‌పవర్‌ను కలిగి ఉండటం లాంటి అంశాలపై దృష్టిసారించాలని సూచించారు. ఆయా అంశాలపై స్వయం నియంత్రణ కలిగి ఉండాలని అన్నారు. అదృష్టవశాత్తు రాష్ట్ర ప్రభుత్వమే అన్ని అంశాల్లో స్టార్టప్‌ కంపెనీల ఏర్పాటదారులకు సహకారం అందిస్తోందన్నారు. ఆయా అలోచనలకు తుదిరూపం ఇవ్వాల్సింది మాత్రం స్టార్టప్‌ కంపెనీల స్థాపకులేనని అన్నారు. ఒకసారి పరిశ్రమల స్థాపనలో ముందుకు అడుగువేశాక వెనక్కు తగ్గరాదన్నారు. ఎన్ని ప్రతికూల పరిస్థితులు ఎదురైనా అనుభవంతో నెట్టుకు రావాలని అన్నారు. ముందుగా తమవద్ద ఉన్న వస్తువుకు సొంతంగా మార్కెటింగ్‌ చేసుకునే వీలును కల్పించుకోవాలన్నారు. అప్పుడే క్షేత్రస్థాయిలో నిలదొక్కుకుంటారని సూచించారు. కార్యక్రమంలో ఏపీ ఇన్నోవేషన్‌ సొసైటీ తిరుపతి మేనేజర్‌ గీతాశ్రీ, ఎక్స్‌ఎల్‌ఆర్‌8 మేనేజింగ్‌ డైరెక్టర్‌ గ్లెన్‌రాబిన్‌సన్‌, 33 మంది స్టార్టప్‌ కంపెనీల ప్రతినిధులు పాల్గొన్నారు.

మరిన్ని వార్తలు

జిల్లా వార్తలు

© 1999- 2017 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.